სამყარო შარიათის სამზერიდან (რეცენზია ნანი გელოვანის მონოგრაფიაზე – „შარიათი: ისტორია, დოგმატიკა, სამართალი“, გამომცემლობა „ფავორიტი სტილი“, 2024, 771 გვ.)

ანოტაცია

წიგნი — „შარიათი: ისტორია, დოგმატიკა, სამართალი“ მომზადდა ივანე ჯავახიშვილის სახელობის თბილისის სახელმწიფო უნივერსიტეტში და გამოიცა 2024 წელს შოთა რუსთაველის საქართველოს ეროვნული სამეცნიერო ფონდის ფინანსური მხარდაჭერით. ნაშრომი წარმოადგენს ისლამური სამართლის სრულყოფილ და ნათელ პანორამას — მის დოქტრინულ სკოლებს, რიტუალურ პრაქტიკას, სამართლებრივ ნორმებსა და ულამების როლს მუსლიმური ქვეყნების სოციალურ-პოლიტიკურ ცხოვრებაში. მასში წარმოდგენილია სახელმწიფო, სისხლის, პირადი სტატუსისა და ფინანსური სამართლის საფუძვლიანი განხილვა და ანალიზი. ნაშრომი ეყრდნობა ისლამური სამართლის პირველწყაროებს, ისტორიულ წყაროებსა და ნორმატიულ-სამართლებრივ აქტებს. მკვლევარმა ქართულ სამეცნიერო დისკურსში შემოიტანა დიდი რაოდენობით უცხოური სამეცნიერო ნაშრომები და საარქივო მასალები. ყოველივე ამის გათვალისწინებით, ავტორმა არა მხოლოდ დეტალურად აღწერა შარიათის ახალი განზომილებები და ნიუანსები, არამედ გამჭრიახი მკითხველისთვის წარმოაჩინა კარდინალური და კრიტიკულად მნიშვნელოვანი საკითხები. თქვენ გაეცნობით არა მხოლოდ შარიათის სისტემასა და მის თავისებურებებს ისლამურ სამართალში, არამედ ნაშრომს, რომელიც უაღრესად მნიშვნელოვანია ზოგადი სამართლის, ზოგადი პოლიტიკისა და ზოგადი კულტურის პერსპექტივიდან. აშკარაა, რომ ასეთი ფუნდამენტური მონოგრაფია ვერ შეიქმნებოდა მხოლოდ სამართლებრივი პერსპექტივით, შარიათის სხვადასხვა ასპექტის ყოვლისმომცველი კვლევის გარეშე; ამისათვის აუცილებელი იყო ისტორიულ-ტიპოლოგიური, შედარებით-სამართლებრივი, აქსიოლოგიური, დოგმატური, აღწერილობითი, ფორმალურ-სამართლებრივი და ლოგიკურ-სისტემური მეთოდების გამოყენება, რაც ნათლად ჩანს ამ ნაშრომის გაცნობისას. ეს მონოგრაფია გაჯერებულია სპეციფიკური საკითხებით, თუმცა იგი იმგვარი ოსტატობითა და დახვეწილობითაა შედგენილი, რელიგიურ-სამართლებრივი ფონი კი იმდენად შთამბეჭდავია და არგუმენტაცია იმდენად დინამიკური, რომ წიგნი „შარიათი: ისტორია, დოგმატიკა, სამართალი“ ცოცხლად საკითხავ ლიტერატურას განეკუთვნება და ადვილად გასაგები და აღქმადი იქნება მკითხველთა ყველა ფენისთვის. თქვენ არა მხოლოდ გაეცნობით შარიათის სისტემას, არამედ დაინახავთ მის დიდ მნიშვნელობას ზოგადსაკაცობრიო სამართლებრივი და კულტურული თვალსაზრისით. ის მაღალი რანგი, რომელსაც ქართულმა აღმოსავლეთმცოდნეობამ საერთაშორისო ასპარეზზე მიაღწია, და ტრადიცია, რომელიც უწყვეტი, მრავალმხრივი და მუხტით სავსეა, სრულად აისახა ამ მონოგრაფიაში: ნანი გელოვანის „შარიათი: ისტორია, დოგმატიკა, სამართალი“ — როგორც საკუთარი სისხლი და ხორცი, იგი ღირსეული სამეცნიერო ტრადიციის განსახიერებაა.